LIVE TV
തിരുവനന്തപുരം: കെ ജി ജോര്ജിന്റെ നിര്യാണത്തില് അനുശോചനമറിയിച്ച് പ്രതിപക്ഷ നേതാവ് വി ഡി സതീശന്. തെന്നിന്ത്യന് ചലച്ചിത്ര ലോകം കണ്ട ഏറ്റവും മികച്ച സംവിധായകനാണ് കെ ജി ജോര്ജെന്ന് അദ്ദേഹം പറഞ്ഞു. സ്വപ്നാടനം പോലെ ഒരു സിനിമാ ജീവിതം അതായിരുന്നു കെ ജി ജോര്ജ്. മലയാള സിനിമയില് നവതരംഗത്തിന് വഴി വെട്ടിയ സംവിധായകനായിരുന്നു കെ ജി ജോര്ജെന്നും വി ഡി സതീശന് പ്രതികരിച്ചു.
ന്യൂജെന് എന്ന് നമ്മള് ഇപ്പോള് വിശേഷിപ്പിക്കുന്ന സിനിമകളുടെ തലതൊട്ടപ്പനായിരുന്നു അദ്ദേഹം. കഠിനമായ ജീവിതാവസ്ഥകളെ സത്യസന്ധമായി അവതരിപ്പിച്ച സിനിമകള്. കലാമൂല്യവും വാണിജ്യ സാധ്യതയും ഒരു പോലെ നിലനിര്ത്തിയ കാലാതിവര്ത്തിയായ ചലച്ചിത്രങ്ങള്. ആദാമിന്റെ വാരിയെല്ല് ഇന്ത്യന് സിനിമ കണ്ട ഏറ്റവും മികച്ച സ്ത്രീപക്ഷ സിനിമകളിലൊന്നാണ്.
പ്രമേയത്തിലെ വ്യത്യസ്ത തിരശീലയില് യാഥാര്ഥ്യമാക്കിയ സംവിധായകനാണ് കെ ജി ജോര്ജ്. ആ സിനിമകളില് ഒന്നും സൂപ്പര് താരങ്ങളില്ല, കഥാപാത്രങ്ങള് മാത്രം. സംവിധായകനായിരുന്നു യഥാര്ഥ നായകന്. മലയാള സിനിമയല്ല തെന്നിന്ത്യന് ചലച്ചിത്ര ലോകം കണ്ട ഏറ്റവും മികച്ച സംവിധായകനാണ് കെ ജി ജോര്ജ്. അദ്ദേഹത്തിന്റെ സൃഷ്ടികള് എക്കാലവും ഒരു പാഠശാലയായി നിലനില്ക്കുമെന്നും പ്രതിപക്ഷ നേതാവ് പറഞ്ഞു.
